ಪ್ರಾರಂಭದ ಪ್ರಾರ್ಥನೆ

ಪ್ರಿಯ ಬಾಲಯೇಸುವೇ, ನಿಮ್ಮ ಕರಗಳು ನಮ್ಮನ್ನು ಸ್ವಾಗತಿಸಲು ಚಾಚಲಾಗಿವೆ. ನಮ್ಮನ್ನು ಆಶೀರ್ವದಿಸಲು ನಮ್ಮ ಮೇಲೆ ಹರಡಲಾಗಿದೆ. ನಿಮ್ಮನ್ನು ಆರಾಧಿಸಿ ಸ್ತುತಿಸುತ್ತಾ ಈ ಸಮಯವನ್ನು ನಿಮ್ಮ ಸನ್ನಿಧಿಯಲ್ಲಿ ಕಳೆಯಲು ಕೃಪೆನೀಡಿರಿ. ನೀವೇ ನಮ್ಮ ಪ್ರಭುವು ಹಾಗು ರಕ್ಷಕರು, ನೀವು ಸದಾ ನಮ್ಮನ್ನು ಪರಿಪಾಲಿಸುತ್ತೀರಿ. ನಮ್ಮನ್ನು ಪರಿಪಾಲಿಸುವುದರಿಂದ ನಮ್ಮ ಪ್ರಾರ್ಥನೆಗಳಿಗೆ ಕಿವಿಗೊಡಲು ನಮ್ಮ ಬಳಿ ಇರುವಿರಿ. ನಿಮ್ಮ ಶ್ರೇಷ್ಠ ಸಹಾಯವನ್ನು ನಮಗೆ ಸದಾ ನೀಡಬೇಕೆಂದು ಪಿತದೇವರೊಂದಿಗೆ ಪವಿತ್ರಾತ್ಮರ ಐಕ್ಯದಲ್ಲಿ ಯುಗಯುಗಾಂತರಕ್ಕೂ ಜೀವಿಸಿ ಆಳುವ ನಿಮ್ಮನ್ನು ದೈನ್ಯದಿಂದ ಪ್ರಾರ್ಥಿಸುತ್ತೇವೆ. ಆಮನ್.

ನವೇನ ಪ್ರಾರ್ಥನೆ

ಅದ್ಭುತಶಾಲಿಯಾದ ಬಾಲಯೇಸುವೇ, ನಾವು ನಿಮ್ಮ ಪ್ರತಿಮೆಯ ಮುಂದೆ ಸಾಷ್ಟಾಂಗವಾಗಿ ಅಡ್ಡಬಿದ್ದು, ನಿಮ್ಮ ಸಹಾಯವನ್ನು ಯಾಚಿಸುತ್ತೇವೆ. ನೊಂದಿರುವ ನಮ್ಮ ಹೃನ್ಮನಗಳ ಮೇಲೆ ನಿಮ್ಮ ಕೃಪಾಕಟಾಕ್ಷವನ್ನು ಇರಿಸಿರಿ. ಪ್ರೀತಿಮಯ ಹಾಗೂ ಕರುಣಾಭರಿತ ಹೃದಯವುಳ್ಳ ನೀವು ನಮ್ಮ ದೀನ ಪ್ರಾರ್ಥನೆಗಳೆಂದ ಮನಕರಗಿ ನಾವು ಭಕ್ತಿಯಿಂದ ಕೋರುವ ವರಗಳನ್ನು ದಯಪಾಲಿಸಿರಿ.

(ವೈಯಕ್ತಿಕ ಕೋರಿಕೆಗಳನ್ನು ಇಲ್ಲಿ ನಿವೇದಿಸಬಹುದು)

ನಮಗೆ ಉಂಟಾಗಿರುವ ಅಧೈರ್ಯವನ್ನು ತೊಲಗಿಸಿರಿ, ನಮಗೆ ಬಂದೊದಗಿರುವ ಕಷ್ಟ ಕಾರ್ಪಣ್ಯಗಳನ್ನು ದೂರಮಾಡಿರಿ. ನಿಮ್ಮ ಪವಿತ್ರ ಬಾಲ್ಯದ ನಿಮಿತ್ತ ನಮ್ಮ ಪ್ರಾರ್ಥನೆಗಳನ್ನು ಆಲಿಸಿ ಉಪಕಾರವನ್ನೂ ಉಪಶಮನವನ್ನೂ ನೀಡಿರಿ. ನಿಮ್ಮ ಸಹಾಯವನ್ನು ಪಡೆದು ಧನ್ಯರಾದ ನಾವು ಪಿತನೊಂದಿಗೂ ಪವಿತ್ರಾತ್ಮರೊಂದಿಗೂ ಸದಾ ಕಾಲಕ್ಕೂ ನಿಮ್ಮನ್ನು ಸ್ತುತಿಸುವೆವು. ಆಮೆನ್.

ಬಲಿಪೂಜೆಯ ಸದುದ್ದೇಶ

ಪ್ರಿಯ ಪುಟ್ಟ ಬಾಲಯೇಸುವೇ, ಪರಲೋಕದ ತಂದೆಯನ್ನು ನಮ್ಮ ತಂದೆಯೆಂದು ಕರೆಯಲು ನಮಗೆ ಬೋಧಿಸಿದ್ದೀರಿ. ಆ ತಂದೆಯ ಮಹಿಮೆಗಾಗಿ ನಿಮ್ಮೊಂದಿಗೆ ನಾವು ಈ ಬಲಿಪೂಜೆಯನ್ನು ಅರ್ಪಿಸುತ್ತೇವೆ. ನಿಮ್ಮೊಂದಿಗೆ ನಮ್ಮೆಲ್ಲರನ್ನು ಆ ಪರಮ ತಂದೆಗೆ ಸುಗಂಧ ಬಲಿ ಕಾಣಿಕೆಯಾಗಿ ಅರ್ಪಿಸುತ್ತೇವೆ. ನಮಗಾಗಿಯೂ ವಿಶ್ವದ ಸರ್ವ ಜನರಿಗಾಗಿಯೂ ಈ ಬಲಿಪೂಜೆಯನ್ನು ಸಮರ್ಪಿಸುತ್ತೇವೆ.

Click For Download

ಪವಿತ್ರ ಯೇಸುಬಾಲರಿಗೆ ಪ್ರಾರ್ಥನಾಮಾಲೆ

ಪವಿತ್ರ ಯೇಸುಬಾಲರ ಜಪಮಾಲೆಯನ್ನು ಈ ಕೆಳಕಂಡ ರೀತಿಯಲ್ಲಿ ಹೇಳಬೇಕು:

ಪವಿತ್ರ ಕುಟುಂಬದ ಮಹಿಮೆಗಾಗಿ ಪರಲೋಕ ಪ್ರಾರ್ಥನೆ - 3 ಸಲ

ಪವಿತ್ರ ಬಾಲಯೇಸುವಿನ ಹನ್ನೆರಡು ವರ್ಷಗಳ ಜ್ಞಾಪಕಾರ್ಥವಾಗಿ ನಮೋ ಮರಿಯ ಪ್ರಾರ್ಥನೆ - 12 ಸಲ

ಪರಮತ್ರಿತ್ತದ ಸ್ತುತಿಗಾಗಿ ಪಿತನಿಗೂ ಸುತನಿಗೂ - 3 ಸಲ

ಪರಲೋಕ ಪ್ರಾರ್ಥನೆಯನ್ನು ಹೇಳುವುದಕ್ಕೆ ಮೊದಲು ಪ್ರತಿಯೊಂದು ಸಲ “ದೇವರ ವಾರ್ತೆಯಾದವರು ಮನುಷ್ಯರಾದರು ಮತ್ತು ನಮ್ಮೊಡನೆ ವಾಸವಾಗಿದ್ದರು" ಎಂದು ಹೇಳಬೇಕು.

ಪಿತನಿಗೂ ಸುತನಿಗೂ.... ಹೇಳುವುದಕ್ಕೆ ಮೊದಲು "ಪವಿತ್ರ ಯೇಸುಬಾಲರೇ, ನಮ್ಮನ್ನು ಆಶೀರ್ವದಿಸಿ ನಮ್ಮ ಕೋರಿಕೆಗಳನ್ನು ನೆರವೇರಿಸಿರಿ” ಎಂದು ಹೇಳಬೇಕು.

ಪ್ರತಿ ನಮೋ ಮರಿಯ ಪ್ರಾರ್ಥನೆಯನ್ನು ಹೇಳುವಾಗ, ಬಾಲಯೇಸುವಿನ ಬಾಲ್ಯದ ಈ ಕೆಳಗಿನ ರಹಸ್ಯಗಳನ್ನು ಧ್ಯಾನಿಸಬಹುದು:

ಪ್ರಾರ್ಥನೆ: ಪವಿತ್ರ ಯೇಸುಬಾಲರೇ, ನಿಮ್ಮ ಸರ್ವಶಕ್ತಿ ಆಶ್ಚರ್ಯಕರವಾದುದು. ಆಶೀರ್ವದಿಸಲು ಚಾಚಿರುವ ನಿಮ್ಮ ಕೈ ಅದ್ಭುತಕರವಾದುದು. ಎಲ್ಲಾ ತರಹದ ಕೃಪಾವರಗಳನ್ನು ನಮ್ಮ ಮೇಲೆ ಸುರಿಸಿರಿ. ನಿಮ್ಮಲ್ಲಿ ಭರವಡೆಯಿಟ್ಟು ಪ್ರಾರ್ಥಿಸುವವರಿಗೆ ಕರುಣೆಯಿಂದ ಕಿವಿಗೊಡಿರಿ, ಆಮೆನ್.

ಈ ಭಕ್ತಿಯು ಪವಿತ್ರ ಯೇಸುಬಾಲರಿಗೆ ಎಷ್ಟು ಪ್ರಿಯವಾದದ್ದು ಎಂಬುದನ್ನು ಯೇಸುಬಾಲರೇ ಸಂತ ಮಾರ್ಗರೇಟಮ್ಗಳಿಗೆ ಹೇಳಿದ ಮಾತುಗಳಿಂದ ವ್ಯಕ್ತವಾಗುತ್ತದೆ. ಈ ಜಪಮಾಲೆಯನ್ನು ಪೂರ್ಣವಿಶ್ವಾಸದಿಂದ ಹೇಳಿ ಅವರ ಪವಿತ್ರ ಬಾಲ್ಯವನ್ನು ಮಹಿಮೆಪಡಿಸುವವರಿಗೆ ವಿಶಿಷ್ಟ ವರಗಳನ್ನು ಪರಿಪಾಲಿಸುವುದಾಗಿ ವಾಗ್ದಾನ ಮಾಡಿದ್ದಾರೆ. ಎಲ್ಲಕ್ಕಿಂತಲೂ ಮಿಗಿಲಾಗಿ ಪವಿತ್ರ ಯೇಸುಬಾಲರ ಭಕ್ತರಿಗೆ ವಿರಕ್ತತ್ವ ಹಾಗೂ ಪರಿಶುದ್ಧತೆಯನ್ನು ಕಾಪಾಡುವಂಥ ಕೃಪೆಯನ್ನು ನೀಡುವುದಾಗಿ ಮಾತು ಕೊಟ್ಟಿದ್ದಾರೆ.

ಭಕ್ತಿಯುಳ್ಳ ವಿಶ್ವಾಸಿಗಳೇ, ಮಕ್ಕಳಿಗೆ ಜ್ಞಾನಸ್ನಾನದಲ್ಲಿ ಇದ್ದಂಥ ನಿಷ್ಕಪಟ ಮನಸ್ಸನ್ನು ಸದಾಕಾಲ ಅವರಲ್ಲಿ ಕಾದಿರಿಸಲು ಬಯಸುವಿರಾ? ಅಚಲ ಭಕ್ತಿಯನ್ನು ಅವರಲ್ಲಿ ಮೂಡಿಸಿರಿ. ವಿಶ್ವಾಸದಿಂದ ಈ ಜಪಮಾಲೆಯನ್ನು ಹೇಳುವ ಅಭ್ಯಾಸವನ್ನು ಮಾಡಿರಿ. ಪ್ರೀತಿಯಿಂದ ಯೇಸುಬಾಲರ ಬಳಿಗೆ ಅವರನ್ನು ಕರೆತನ್ನಿರಿ. ಯೇಸುಬಾಲರನ್ನು ಪ್ರೀತಿಸಿ ಅವರನ್ನು ಅನುಕರಿಸುವಂತೆ ಮಾಡಿರಿ.

Click For Download

ಪವಿತ್ರ ಯೇಸುಬಾಲರಿಗೆ ಮನವಿಮಾಲೆ

ಕೃತಜ್ಞತಾ ಪ್ರಾರ್ಥನೆ

ದಯಾಭರಿತ ಬಾಲಯೇಸುವೇ, ನಿಮ್ಮ ಮುಂದೆ ಮೊಣಕಾಲೂರಿ, ನನ್ನ ಮೇಲೆ ನೀವು ಸುರಿಸಿದ ಕೃಪಾವರಗಳಿಗಾಗಿ ಮನಃಪೂರ್ವಕವಾಗಿ ವಂದನೆಗಳನ್ನು ಸಲ್ಲಿಸುತ್ತೇನೆ. ನಿಮ್ಮ ಕರುಣೆಯನ್ನು ಯಾವಾಗಲೂ ಸ್ಮರಿಸಿಕೊಂಡು, ನೀವೇ ನನ್ನ ದೇವರು, ನೀವೇ ನನ್ನ ಸಹಾಯಕರು, ನೀವೇ ನನ್ನ ಆಶ್ರಯದಾತರು ಎಂದು ನಿವೇದಿಸುತ್ತೇನೆ. ನಿಮ್ಮ ದಯೆ ಹಾಗೂ ಅಪರಿಮಿತ ಕೊಡುಗೆಗಳನ್ನು ಎಲ್ಲೆಲ್ಲೂ ಸಾರುತ್ತೇನೆ. ನಿಮ್ಮ ಅಪಾರ ಪ್ರೀತಿ, ಪರಾಮರಿಕೆ ಸರ್ವರಿಗೂ ತಿಳಿಯುವಂತಾಗಲಿ. ನಿಮ್ಮ ಬಾಲ್ಯದ ಭಕ್ತಿ, ಮಾನವ ಕೋಟಿಯ ಹೃನ್ಮನಗಳಲ್ಲಿ ಆಳವಾಗಿ ಬೇರೂರಲಿ. ನಿಮ್ಮ ಸಹಾಯವನ್ನು ಪಡೆದವರೆಲ್ಲರೂ ನಿಮ್ಮ ಪವಿತ್ರ ಬಾಲ್ಯಕ್ಕೆ ಪ್ರಣಾಮಗಳನ್ನು ಸಲ್ಲಿಸಿ, ನಿಮ್ಮನ್ನು ಸದಾಕಾಲಕ್ಕೂ ಸ್ತುತಿಸಿ ಮಹಿಮೆಪಡಿಸಲಿ. ಆಮೆನ್.

ಬಾಲಯೇಸುವಿಗೆ ನಮ್ಮ ಸಮರ್ಪಣೆ

ಪ್ರಿಯ ಬಾಲಯೇಸುವೇ, ನಾನು ನಿಮ್ಮನ್ನು ಆರಾಧಿಸುತ್ತೇನೆ. ನನ್ನ ಮೇಲಿನ ಪ್ರೀತಿಯ ಸಲುವಾಗಿ ಒಂದು ಮಗುವಾಗಿ ಜನಿಸಿದಿರಿ. ನಿಮ್ಮ ಉನ್ನತ ಈ ಪ್ರೀತಿಗಾಗಿ ನಿಮ್ಮನ್ನು ಸ್ತುತಿಸುತ್ತೇನೆ; ನಿಮ್ಮ ಪವಿತ್ರ ರಹಸ್ಯಗಳನ್ನು ಸನ್ಮಾನಿಸುತ್ತೇನೆ. ನಿಮ್ಮ ಪ್ರೀತಿಗೆ ಬದಲಾಗಿ ನಾನು ನನ್ನನ್ನೇ ಸಂಪೂರ್ಣವಾಗಿ ನಿಮಗೆ ಅರ್ಪಿಸುತ್ತೇನೆ. ನಿಮ್ಮ ಪವಿತ್ರ ಬಾಲ್ಯದ ಸದ್ಗುಣಗಳನ್ನು ನನಗೂ ದಯಪಾಲಿಸಬೇಕೆಂದು ವಿನಂತಿಸುತ್ತೇನೆ. ಪ್ರಿಯ ಯೇಸುವೇ, ದೀನತೆಯಿಂದ ನಿಮ್ಮ ಔದಾರ್ಯವನ್ನೂ, ಪ್ರೀತಿಯೆಂಬ ಮಾಧುರ್ಯವನ್ನೂ ನನಗೆ ದಯಪಾಲಿಸಿರಿ. ನಿಮ್ಮ ವಿನಯ ಹಾಗೂ ಸರಳ ಸ್ವಭಾವವನ್ನು ನಾನು ಅನುಕರಿಸುವಂತೆ ಮಾಡಿರಿ. ನಿಮ್ಮನ್ನು ಪ್ರೀತಿಯಿಂದ ಅನುಕರಿಸಿ ನಿಮ್ಮ ಮಹೋನ್ನತ ಸನ್ನಿಧಿಯನ್ನು ಸೇರುವಂತೆ ಮಾಡಿರಿ. ಆಮೆನ್

ಕಷ್ಟದಲ್ಲಿರುವಾಗ ಹೇಳತಕ್ಕ ಪ್ರಾರ್ಥನೆ

ಪ್ರಿಯ ಯೇಸುವೇ, ಮಾನವನ ಹೃದಯದಲ್ಲಿ ನೆಲೆಸಿ ಅಪಾರ ಕೃಪಾವರಗಳನ್ನು ಅವನ ಮೇಲೆ ಸುರಿಸುವುದೇ ನಿಮಗೆ ಪರಮಾನಂದವಾಗಿದೆ. ನಿಮ್ಮಲ್ಲಿ ನಂಬಿಕೆಯಿಟ್ಟವರೆಲ್ಲರೂ ವಿಶೇಷ ವರಗಳನ್ನು ಪಡೆದಿದ್ದಾರೆ. ಅವರ ಪ್ರಾರ್ಥನೆಯ ಫಲವನ್ನು ಸವಿಯುತ್ತಿದ್ದಾರೆ. ನಿಮ್ಮ ಅದ್ಭುತಕರ ಪ್ರತಿಮೆಯ ಮುಂದೆ ಮೊಣಕಾಲೂರಿ, ಬಿಚ್ಚುಮನಸ್ಸಿನಿಂದ ನನ್ನ ಕೋರಿಕೆಗಳನ್ನು, ಆಶೆ-ಆಕಾಂಕ್ಷೆಗಳನ್ನು ನಿಮ್ಮ ಮುಂದೆ ಇಡುತ್ತೇನೆ. ವಿಶೇಷವಾಗಿ ಈ ವರಗಳನ್ನು ಕರುಣಿಸಬೇಕೆಂಬುದೇ ನನ್ನ ಇಚ್ಚೆಯಾಗಿದೆ. ನಿಮ್ಮ ಚಿತ್ತದ ಪ್ರಕಾರ ನನ್ನನ್ನು ನಡೆಸಿರಿ. ನಿಮ್ಮ ಪರಮಜ್ಞಾನ, ನಿಮ್ಮ ಅಪಾರ ಪ್ರೀತಿ ನನಗೆ ಒಳಿತನ್ನೇ ಕರುಣಿಸುವುದೆಂಬ ನಂಬಿಕೆ ನನಗಿದೆ. ಈ ಕಷ್ಟದಲ್ಲಿ ನನಗೆ ನೆರವಾಗಿದ್ದು ನನ್ನನ್ನು ಚೇತನಗೊಳಿಸಬೇಕೆಂದು ನಿಮ್ಮನ್ನು ದೈನ್ಯದಿಂದ ವಿನಂತಿಸುತ್ತೇನೆ.

ಅಸ್ವಸ್ಥರಾದವರಿಗಾಗಿ ಪ್ರಾರ್ಥನೆ

ಕರುಣಾಭರಿತ ಯೇಸುಬಾಲರೇ, ವ್ಯಾಧಿಸ್ತರ ಮೇಲೆ ನೀವು ಕರುಣೆ ತೋರುತ್ತೀರೆಂದು ನಾನು ನಂಬಿದ್ದೇನೆ. ಇಹಲೋಕದಲ್ಲಿರುವಾಗ ನಿಮ್ಮ ಮಾಧುರ್ಯ ಸ್ಪರ್ಶದಿಂದ ಅಸಾಧ್ಯವೆನಿಸಿದ ಎಲ್ಲಾ ತರಹದ ರೋಗಗಳಿಂದ ಬಳಲುತ್ತಿದ್ದವರನ್ನು ಗುಣಪಡಿಸಿದಿರಿ. ವಿವೇಕ ನಗರಕ್ಕೆ ಬಂದು ನಿಮ್ಮ ಅದ್ಭುತಕರ ಪ್ರತಿಮೆಯನ್ನು ಕಂಡು ಹಿಂತಿರುಗುವ ಸಾವಿರಾರು ಭಕ್ತಾದಿಗಳು ತೀವ್ರ ಯಾತನೆಯಿಂದಲೂ ಬಾಧೆಗಳಿಂದಲೂ ಬಿಡುಗಡೆ ಹೊಂದಿ ಸ್ವಸ್ಥರಾಗಿದ್ದಾರೆ. ಪಾಪಿಯಾದ ನನಗೆ ಈ ಬಾಧೆಯು ಪ್ರಾಪ್ತಿಯಾಗಿರುವುದು ನ್ಯಾಯವೇ ಸರಿ. ನಿಮ್ಮ ಸಹಾಯವನ್ನು ಕೇಳಲು ಯಾವ ಹಕ್ಕೂ ನನಗಿಲ್ಲ. ಆದರೆ ನಿಮ್ಮ ಪವಿತ್ರ ಬಾಲ್ಯದ ನಿಮಿತ್ತ ಕಡುಪಾಪಿಗಳಿಗೂ ಸಹ ನೀವು ಕರುಣಿಸಿದ ಸ್ವಸ್ಥತೆಯನ್ನು ಕಂಡಿರುವುದರಿಂದ ನೀವು ನನಗೆ ಖಂಡಿತವಾಗಿ ಕರುಣೆ ತೋರುವಿರೆಂದು ನಂಬುತ್ತೇನೆ. ಓ ದಿವ್ಯ ವೈದ್ಯರಾದ ಯೇಸುವೇ,

(ಕಾಯಿಲೆಯನ್ನು ನಿವೇದಿಸಬಹುದು)

ನಾನು ಈ ಕಾಯಿಲೆಯಿಂದ ಗುಣಮುಖನಾಗಬೇಕೆಂದು ನಿಮಗೆ ಚಿತ್ತವಿದ್ದರೆ, ನಿಮ್ಮ ಅಮೃತ ಹಸ್ತವನ್ನು ಚಾಚಿ ನನಗೆ ಸಹಾಯ ಮಾಡಿರಿ. ನನ್ನ ಯಾತನೆಯನ್ನು ನೀಗಿಸಿ ಸಕಲ ರೋಗ-ರುಜಿನಗಳಿಂದ ನನ್ನನ್ನು ಬಿಡುಗಡೆ ಮಾಡಿರಿ. ಆದರೆ, ನಿಮ್ಮ ಅಗಾಧ ಜ್ಞಾನದ ಸಲುವಾಗಿ ನಾನು ಈ ಕಾಯಿಲೆಯಿಂದ ಸಹಿಸಬೇಕೆಂದು ನಿಮ್ಮ ಚಿತ್ತವಾದರೆ ನನ್ನ ಆತ್ಮವನ್ನಾದರೂ ಕರುಣೆಯಿಂದ ಗುಣಪಡಿಸಿರಿ. ನನ್ನ ಬಾಧೆಗಳನ್ನು ಸಹನೆಯಿಂದ ತಾಳಿಕೊಳ್ಳಲು ನಿಮ್ಮ ಉಪಶಮನದ ಕಾಂತಿಯು ನನ್ನನ್ನು ಆದರಿಸಲಿ. ದೈಹಿಕ ಯಾತನೆಗಳೆಲ್ಲವೂ ಕ್ಷಣಿಕವಾದುದೆಂಬುದನ್ನು ನಾನು ಮನಗಾಣುವಂತಾಗಲಿ.

ಓ ದಯಾಮಯ ಯೇಸುಬಾಲರೇ, ನಿಮ್ಮ ಚಿತ್ರಕ್ಕೆ ಅನುಸಾರವಾಗಿ ಎಲ್ಲವನ್ನೂ ಶಾಂತಿಯಿಂದ ಸಹಿಸಿಕೊಳ್ಳಲು ಕೃಪೆ ನೀಡಿರಿ. ನನ್ನ ಅಲ್ಪ ಯಾತನೆಯಲ್ಲಿ ಘೋರ ಯಾತನೆಯನ್ನು ಸಹಿಸಿದ ನಿಮ್ಮನ್ನು ಹೋಲುವಂತೆ ಮಾಡಿರಿ. ನನಗೆ ನಿತ್ಯ ಜೀವನವು ದೊರಕುವವರೆಗೂ ಶಯನದಲ್ಲಿ ನಿಮ್ಮ ಪರಾಮರಿಕೆಯನ್ನು ನಾನು ಸ್ತುತಿಸುವಂತಾಗಲಿ. ಆಮೆನ್.

ಸ್ಮರಿಸಿಕೊಳ್ಳಿ ಬಾಲಯೇಸುವೇ

ಪವಿತ್ರ ಬಾಲಯೇಸುವೇ, ನೀವು ಪರಮ ಪ್ರಸಾದದ ಭಕ್ತಿಯಾದ ಸಂತ ಮಾರ್ಗರೀತಮ್ಗಳಿಗೆ ಹೇಳಿದ ಮಾತುಗಳನ್ನು ಸ್ಮರಿಸಿಕೊಳ್ಳಿರಿ. ಜೀವನದ ಹೊರೆಯಿಂದ ಕುಗ್ಗಿ ಕಂಗಾಲಾಗಿರುವ ಮಾನವ ಕೋಟೆಗೆ “ಈ ಪವಿತ್ರ ಹೃದಯದಿಂದ ನಿಮಗೆ ಬೇಕಾದುದನ್ನು ಪಡೆಯಿರಿ. ನನ್ನ ಬಾಲ್ಯದ ಪುಣ್ಯಫಲಗಳ ನಿಮಿತ್ತ ನಿಮಗೆ ಯಾವುದೂ ನಿರಾಕರಿಸಲ್ಪಡುವುದಿಲ್ಲ” ಎಂಬ ಉಪಶಮನವನ್ನೀಯುವ ನಿಮ್ಮ ಅಭಯದ ವಚನವನ್ನು ಸ್ಮರಿಸಿಕೊಳ್ಳಿರಿ. ಓ ಯೇಸುವೇ, ಪರಮ ಸತ್ಯವಾಗಿರುವ ನಿಮ್ಮಲ್ಲಿ ಪೂರ್ಣ ನಂಬಿಕೆಯನ್ನಿಟ್ಟು ನಿಮ್ಮ ಚಿಂತಾಜನಕ ಸ್ಥಿತಿಯನ್ನು ಕುರಿತು ಹೇಳಲು ನಿಮ್ಮ ಬಳಿಗೆ ಬಂದಿರುತ್ತೇನೆ. ನಿತ್ಯ ಆನಂದ ಪಡೆಯಲು ಯೋಗ್ಯರಾಗಲು ನಾವು ಪುಣ್ಯ ಮಾರ್ಗದಲ್ಲಿ ನಡೆಯುವಂತೆ ಮಾಡಿರಿ. ನಿಮ್ಮ ಮನುಷ್ಯಾವತಾರ ಮತ್ತು ಪವಿತ್ರ ಬಾಲ್ಯದ ನಿಮಿತ್ತ ನಮಗೆ ಅತೀ ಅವಶ್ಯವಾಗಿರುವ ಕೃಪಾವರಗಳನ್ನುಕರುಣಿಸಿರಿ

ನಾವು ಅಪನಂಬಿಕೆಪಟ್ಟು ಎಂದೂ ಆಶಾಭಂಗವಾಗುವಂತಿಲ್ಲ. ಏಕೆಂದರೆ ನಾವು ನಿಮ್ಮ ಕರಗಳಲ್ಲಿ ನಮ್ಮ ಸರ್ವಸ್ವವನ್ನೂ ಅರ್ಪಿಸುತ್ತೇವೆ. ಸರ್ವಶಕ್ತ ದೇವರೇ, ನೀವು ಮಾಡಿದ ವಾಗ್ದಾನದ ನಿಮಿತ್ತ ನಮ್ಮ ದೀನ ಕೋರಿಕೆಗಳನ್ನು ಆಲಿಸಿ ಅವುಗಳನ್ನು ನೆರವೇರಿಸಿಕೊಡಿರಿ. ಆಮೆನ್.

Click For Download

ಅತ್ಯಂತ ಪರಿಣಾಮಕಾರಿ ಪ್ರಾರ್ಥನೆ

ಪ್ರತಿ 9 ಗಂಟೆಗಳವರೆಗೆ ಗಂಟೆಗೊಂದು ಸಾರಿ ಹೇಳತಕ್ಕದ್ದು

ಯೇಸುವೇ, “ಕೇಳಿರಿ ಕೊಡಲಾಗುವುದು, ಹುಡುಕಿರಿ ಸಿಗುವುದು, ತಟ್ಟಿರಿ ತೆರೆಯಲಾಗುವುದು" ಎಂದು ಹೇಳಿದ್ದೀರಿ. ನಿಮ್ಮ ಮಾತೆ ಪರಿಶುದ್ಧ ಮರಿಯಮ್ಮನವರ ಮುಖಾಂತರ ಕೇಳುತ್ತಾ, ಹುಡುಕುತ್ತಾ, ತಟ್ಟುತ್ತಾ ನಿಮ್ಮಲ್ಲಿಗೆ ಬಂದಿರುತ್ತೇನೆ.

ಯೇಸುವೇ “ನನ್ನ ಹೆಸರಿನಲ್ಲಿ ನೀವು ಏನನ್ನು ಕೇಳಿದರೂ ನನ್ನ ತಂದೆಯು ಅದನ್ನು ದಯಪಾಲಿಸುವರು" ಎಂದು ಹೇಳಿದ ಕರ್ತರು ನೀವೇ. ನಿಮ್ಮ ಮಾತೆ ಪರಿಶುದ್ಧ ಮರಿಯಮ್ಮನವರ ಮುಖಾಂತರ ನನ್ನ ಕೋರಿಕೆಯನ್ನು ನಿಮ್ಮ ತಂದೆಯಾದ ದೇವರಿಗೆ ಒಪ್ಪಿಸುವಂತೆ ವಿನಯದಿಂದ ಬೇಡಿಕೊಳ್ಳುತ್ತೇನೆ.

ಯೇಸುವೇ, "ಭೂಮಿ ಆಕಾಶವು ಅಳಿದು ಹೋಗುವುದು, ಆದರೆ ನನ್ನ ವಾಕ್ಯವು ಅಳಿಯಲಾರದು" ಎಂದು ನುಡಿದ ಯೇಸುವೇ, ನಿಮ್ಮ ಮಾತೆ ಮರಿಯಮ್ಮನವರ ಬಿನ್ನಹಗಳಿಂದ ನನ್ನ ಪ್ರಾರ್ಥನೆ ಈಡೇರುವುದೆಂದು ದೃಢವಾಗಿ ನಂಬುತ್ತೇನೆ.

Click For Download