ಬೆಂಗಳೂರಿನ ಅವಿಭಜಿತ ಪವಿತ್ರಹೃದಯ ಧರ್ಮಕೇಂದ್ರ ಬಹಳ ವಿಶಾಲವಾಗಿದ್ದು, ಸೊಣ್ಣನಹಳ್ಳಿ (ವಿವೇಕನಗರ), ವಣ್ಣಾರ್‌ಪೇಟೆ, ನೀಲಸಂದ್ರ, ಆಸ್ಟಿನ್‌ನಗರ ಬಡಾವಣೆ, ಆನೆಪಾಳ್ಯ ಬಡಾವಣೆ, ಈಜಿಪುರ ಮುಂತಾದ ಅನೇಕ ಸ್ಥಳಗಳನ್ನು ಮತ್ತು ಬಡಾವಣೆಗಳನ್ನು ಒಳಗೊಂಡಿತ್ತು. ಇಷ್ಟು ವಿಶಾಲವಾದ ಧರ್ಮಕೇಂದ್ರವನ್ನು ವಿಂಗಡಿಸಿದರೆ ಜನತೆಗೆ ಸೌಕರ್ಯಗಳನ್ನು ನೀಡುವುದರ ಜೊತೆಗೆ ಧರ್ಮಕೇಂದ್ರದ ಗುರುಗಳಿಗೆ ಕಾರ್ಯನಿರ್ವಹಣೆಯೂ ಸುಲಭವಾಗುವುದೆಂದು ತಿಳಿದು, ಆಗಿನ ಧರ್ಮಕೇಂದ್ರದ ಗುರುಗಳಾಗಿದ್ದ ಫಾದರ್ ಪೌಲ್ ಕಿನಾತ್ತುಕರ ಎಂಬುವವರು ಹೊಸ ಧರ್ಮಕೇಂದ್ರಕ್ಕಾಗಿ ಸ್ಥಳವನ್ನು ಹುಡುಕಲಾರಂಭಿಸಿದರು. ಬಹಳ ಕಾಲ ಅವರ ಪ್ರಯತ್ನ ಸಫಲವಾಗಲಿಲ್ಲ. ಆಗ ತಮ್ಮ ಸ್ನೇಹಿತ ಗುರುವೊಬ್ಬರ ಸಲಹೆಯಂತೆ ಪ್ರಾಗ್‌ನ ಬಾಲಯೇಸುವಿನಲ್ಲಿ ಭಕ್ತಿಯಿಂದ ಪ್ರಾರ್ಥಿಸಲು ಆರಂಭಿಸಿದರು. ಬೇಗನೇ, ಅವರ ಪ್ರಾರ್ಥನೆಗೆ ಫಲವೆಂಬಂತೆ, 1969ರಲ್ಲಿ ಸೊಣ್ಣನಹಳ್ಳಿಯಲ್ಲಿ (ಈಗಿನ ವಿವೇಕನಗರ) ಸುಮಾರು ನಾಲ್ಕೂವರೆ ಎಕರೆಯಷ್ಟು (ಸುಮಾರು 1,96,000 ಚದರ ಅಡಿ) ಸುಂದರವಾದ ಬೇಸಾಯದ ಜಮೀನನ್ನು ಬಾಲಯೇಸುವೇ ಅನುಗ್ರಹಿಸಿದರು.

ಆಗಿನ ಮಹಾಧರ್ಮಾಧ್ಯಕ್ಷರಾಗಿದ್ದ ಅತೀ ವಂದನೀಯ ಲೂರ್ದುಸ್ವಾಮಿಯವರು 1969ರ ಏಪ್ರಿಲ್ 8ರಂದು ಹೊಸ ಧರ್ಮಕೇಂದ್ರದ ಕಟ್ಟಡವನ್ನು ಕಟ್ಟಲು ಶಂಕುಸ್ಥಾಪನೆಯನ್ನು ನೆರವೇರಿಸಿದರು.